Zenn grond da Lumbrein

Transport dil zenn grond da Lumbrein   1876

da Otto Antoni Capaul  (scret giu ord igl original ed adattau da Robert Capeder)

Dil temps ch‘igl uestg Rampa oriunds da Puschlav ei staus cheu sin viseta e fatg rendiment da quen ed ha anflau che nossas baselgias seigien memia rehas ferton che baselgias fetg maneivel possedien aschi pauc.El ha considerau che buca ils mirs hagien en ils daners ni ils signurs mobein ils purs hagien en ils capitals che els havevan stuiu far empristar ils onns da fomaz nua ch’ei era faliu la racolta da fein e graun, aschia ch’ils burgheis stuevan pagar tscheins e dieschmas. Quei ei stau terribels onns.

Denton ha el mirau tut speras vi ed ha declarau ch’el hagi il dretg da prender d’ina baselgia e metter tier l’autra.Aschia vuleva el prender in capital ella grondezia da 15 000.- francs e dar quels alla vischnaunca da Morissen – ina gronda pretensiun.Als purs ha quei plan buca plaschiu principalmein al president da vischnaunca, Gion Bistgaun Capaul, che ha mess avon che quei seigi nossa facultad fundada cheu e mantenida da nos vegls ed il pievel ha protestau encunter.El ha menegiau ch’ei drovi beinenqual reparatura avon che schar sbursar per auters la rauba che nos vegls han fundau.

Aschia han ils vischins concludiu da metter neu in niev tuchiez, zenns novs che tunien en accord. Il zenn grond han els vuliu salvar e metter ils auters en accord cun quel.Far in pli grond in sut quel da miezgi ed il da miert ed aunc in pign da batten e scola.

Quei tut ei vegniu dau en accord als culazenns Rasmeier a s. Pieder (Feldkirch) per il capital da 12000.- frs.Alura ein ils zenns vegni fiers giu dil clutger. Ei era in trest mirar, sco sch’ei vegness fiers giu la cardientscha. Dieus ha era buca viu bugen quei. La Cureisma era ei stau 8 baras grondas aschia ch’il zenn vegneva senza calar adina en ina funcziun ni l’autra. In fetg trest temps, 2 baras en in gi.

Silla tuor stevan plirs meisters che havevan da preparar las sutgas tenor plan duront ch’il metal bugleva a Feldkirch.

Il mars digl onn 1876 ei vegniu la nova ch’ils zenns seigien culai e bategiai digl uestg.Els hagien survegniu ils nums: il grond Gion Batest il vegl, Gion l’auter,il da miezgi Maria il 5avel s.Michel,il pign Catrina, il pign vegl Hercli Capaul.

Igl accord da Grasmeier era ch’el meteva ils zenns tochen Cuera sin la staziun.Naven da leu ha la vischnaunca accordau cun sgr. Luis Elvedi da Cumbel cun ses 8 cavals per 800.-francs.

Spert han ins priu a mauns ils pigns che ein en cuort stai a Lumbrein.Il grond ei vegnius mo plaun cun 8 cavals tochen Glion sin buna via stagna.Leu ha el pussau plirs gis essend la via da Lumnezia aunc empau nova ed il mars aunc buca stagna.Biars tschiens han contemplau ed admirau quei coloss che Luis astgava buca pegliar a mauns aschi spert.Finalmein ha el ina dumengia da miezgi entschiet la barhada cun ses cavals sil plaz a Glion sper bia pievel.Cun il buc d’alzar crappa han ei alzau il zenn e mess suten il carr.Avon che tschentar sin il carr ch’el er’aunc pendius hail fravi pitgau cun il marti pliras fermas fridas per il deletg dil pievele per saver co il tun resuni tras Glion.

Havend ussa fatg la carga semettan ils cavals en funcziun cun ferms schlops e gronda canera dil pievel tral marcau.Arrivai si dil stuz da s.Martin leu sut la baselgia haveva il sulegl scaldau la via che las rodas da vart sura ein sfundradas ed il zenn ei lischnaus giu dalla punt e staus fitgaus en la chinetta. Ina pausa da diesch gis per nies spot lunsch entuorn.Il viturin ha declarau per nunpusseivel da menar ora siu accord.Quei ha fatg studiar ils tups da Lumbrein.Quels han fatg il plan da far ina sliusa,per il carr seigi quei memia ault e surprendi e sappi balistrar en in bien liug.Cavals eran scart da survegnir.Perquei ha il pievel dau alarm da metter sut ils bos e cun lavur generala stoppi tut atras.La sliusa ei gleiti stada a mauns cun il plan. La cadeina gronda e suga dueien formar il tgamun e metter 4 mugias a pèr,in’autra cadeina ferma il zenn, aschia ha president Capaul fatg il plan.Gia il secund gi han dus cavals menau naven la schletta.Ils privats han transportau,catschau lur bos tochen Cumbel e leu mess a fein tier sgr. Crest Gieri Vieli il qual ha offeriu il fein gratis sco parentau cun Lumbrein.Ils auters herocs ein i vinavon cun la sliusa e cavals tochen sin il plaz a s.Martin.La damaun marvegl ei vegniu cargau  e mes il cundrez per la manadira.Ei era el meins da mars cun in terment sulegl.Quella notg ed il gi avon vev’ei neviu aschia ch’ei era in bien miez bratsch neiv e quei ei stau da grond avantatg.Cura ch’ils 26 pèra bos ein stai ligiai en menadira sche eisi balucau adina vinavon senza scarpetschs tochen a Cumbel alla duas. A Cumbel sper l’ustria da scarvon Elvedi han ei gastau en si’ustria.Leu ei stau in paus grad era per ils bos che han survegniu circa in miez paun,ils umens in quercli vin cun paun ed il proviant ch’els havevan en tastga.Tut mava bein.La signura Felia Vieli ha ornau il zenn cun in grond bi tschupi.Tut ei puspei semess en moviment.Tut che curreva neutier per mirar la gronda caravana.La neiv vegneva smugliada cun ils bos aschia ch’ei pudevan buca runar la neiv.Tochen Vella eisi iu vinavon senza paus.Leu ei stau 10 minutas paus per mirar sch’ei possien vinavon sin la via veglia tochen Degen.
Alura va ei encunter la caplutta cun mendra via ed ils da Vella han buca dau agid resalvond la famiglia Lumbris che havevan la mumma da Lumbrein.Ils auters fagevan il plan denter els.Quei ei nunpusseivel sin nossa via, aschia ch’els ston schar il zenn epi metter quel a Pleiv – capo liug e capo zenn grond.Denton sin las stortas dadens la caplutta er’ei empau terrein ed ils umens  cun lur tretschas en la cruna tenevan per buca schar far tgamalè il zenn.Ils bos astgavan mo il davos tilar sin la storta ed ein mitschai giu senza malura.Allura han ils da Degen observau ed han tuccau il zenn da lavur cumina. Tut che ei vegniu per rugalar la via ordavon perfin femnas cun lur badels tras il vitg.Cheu ei stau in pauset mo la parola era: vinavon a Vignogn aschi lunsch sco ei sepo.Cheu era biara neiv aschia ch’ei mava plaun cun il far via ordavon per 4 bos a pèr.Negin sa far l’idea tgei stravaganta lavur quei ha dau.Suenter 2 uras e mesa essan nus arrivai a Vignogn.Leu ei tut vegniu sligiau si ed ils da Degen turnai a casa.Tut ils vischins da Lumbrein ein cun furtina vergai naven ei era gie las 6,ils bos mess ein a fein tier possesurs da Lumbrein,tier Gion Franzestg Capaul.Quels ein dabot schetgs giu.La via mala haveva aunc d’entscheiver tras l’Uresa sin schliata via veglia e tras stortas e caglias.Il gi sisu ei tut stau marvegl sin posta schegie fetg staunchels,tgi a far via fular neiv,far che 4 bos sappien star schegie malamein.Ils umens cun las tretschas ella cruna eran pli ad ault e gidavan anavon sco da buca via giun las caglias e dil teis gassa enagiu da buca schar tgamarlar.Da plaun da pors enasi er’ei lom ch’ei runava avon la sliusa neiv,glatsch e lozza aschia ch’ei stueva vegnir alzau cun aigras e mess suten ogna per mover vinavon.Ina lavur stermentusa, negin sa far in’idea.Ei ha cuzzau uras avon che far la storta.Pinar ogna ed ir cun ils bos dallas caglias enasi epi turnar anavos sin la storta.Traversar Uresa ha cuzzasu dalla damaun dallas 7 e mesa entochen las 4 da sera.Dado il santeri era semtgau per trer ad ault.Dalla gassa enasi era quei nunpusseivel pervia dil stretg.La bravura era fatga, il zenn grond steva sin il plaz.Ussa stva il plan els mauns dil culazenns Grasmeier.Igl emprem ha el priu la mesira dil zenn e dalla finastra.Per ch’el possi ella tuor ha el stuiu scalprar ora da mintga vart dil mir 2 canals silsuenter ranschar ils flaschazugs.In era sin la cuppa,quel haveva da trer en da finiastra e l’auter fermaus vid dus quaders che mavan tras il tetg dalla tuor,orasum era fermau la suga liunga che mava cun sias rodas giu tier il zenn ella cruna.La suga mava suroragiu encunter la caplutta,vid quella era rentau nundumbreivla bratscha.Giubas ei vegniu fatg naven il mir santer,mess in apluna ogna  encunter il clutgè per ch’il zenn detti buca cun sia peisa encunter il mir e forsa rumpi.In’autra suga erqa drizzada  da tenner il zenn cura ch’el vegneva alzaus sur il mir per tener anavos ch’el pugni mo lu encunter la pluna ogna.Quella suga mava sut la casa scarvon ora  gronda retscha.Ei il zenn staus el luft ha el anetg tratg tut in sin l’auter,tgi en venter e tgi enbrauncas tochen ch’il mir cuclè ha fatg star eri.La suga liunga ha stendiu mo plaun mo adina vinavo tochen ch’el ei staus avon la finiastra.Alura eisi stuschau 2 quaders sut orasi cun zuolas ed in’aissa ch’el pusava sin quels quaders suenter che la suga ha schau anavos mo plaun.Quei mument tremblava a biars il cor per tema da disgrazia avon ch’el possi tras la finiastra,las canals dil mir schluitavan mal e turn sin la cuppa veva memia pauc forza.Plaunsiu suenter in’ura eis el staus sil plaz senza il pli pign incaps e tuts eran cuntents.Il gi sisu ei vegniu mess il stermentus plumatsch cun las spinas ed alzau ad ault cun la suga dil tetg epi mess en il battagl che peisa ca 300 funs.La suga era buca grossa mo dueva esser tratga en cun fils seidaLa suga tunscheva naven dalla finiastra sura naven dil tetg cuclè tochen oragiu la caplutta ed era leu aun danvons ed ina massa mauns enbrancavan.L’auter gi ei stau il gi da colaudaziun,cheu ei stau dus professers da Cuera dalla scola cantonala, in era professer Bieler e l’auter ?. Quels han giu da declarar  ch’igl accord dils zenns harmoneschien tenor B  cun il zenn vegl, quei ha cuzzau empau gitg.Duront quei temps dueva vegnir tuccau igl emprem in suenter l’auter  epi tuts.En cuclè eran plein umens che exequevan ils camonds.Ei era quei era il gi d’emprova,fussen els fess,havess il culazenns stoviu segirar.Perquei eran ils umens buca maufers da tuccar ferm.Il zenn grond vargava en siu schvung si la fuiniastra ch’il battagl deva si  encunter igl arviul dalla finiastra.Aschibein la commissiun sco l’emprova han colodau ils zenns per gests tuns sco la garanzia en fermezia la caussa era alla fin.

Il plaid pli radical ei stau il pagar quei ei gleiti stau vargau naven da 1872 eisi ussa emblidau.

Per renconuschientscha a sgr.Crest Gieri Vieli che haveva giu la buontad da perver en ses nuegls e cun siu fein ils bos a Cumbel eisi vegniu tucau ils cuors per sia sepultura cura che la eternitad ha clamau el solemnamein cun dir in rusari entir.

Il Grasmeier ha cun la sera schau cuorer en vin a tgi ch’era damaneivel ed augurau che nos zenns possien aunc sunar suenter tschentaners.

Nies uestg Rampa ha tarmess ina gratulaziun cun la ferma benedicziun d’uestg.

Aschia concluda il scribent siu referat ualti detagliau havend el era priu part da tut quels strapazs cun sontga premura e pazienzia attesta tut il sura

Otto Antoni Capaul, naschius 1848 ils 4 de Jener, uss ha el 77 e 4 meins.

Tut tgi che legia rugai per mei.

II zenn grond de Lumbrein


 da Rest Giusep Caminada


Avon onns fuvan las vias de nossa Surselva buca schi cumadeivlas sco ozildi. Quei deva lu grevs transports, sch’ei tuccava de vegnir neutier cun raubas de gronda peisa. Ina dellas pli interessantas vitgiras de nos vegls fuva il transportar ils zenns. Savens vegnevan quels culai el liug, al qual els stuevan survir. Dapi cerca tschien onns ein biars de nos zenns vegni culai a Favugn, a S. Pieder, a Rorschach ne ad Aarau. Igl onn 1876 haveva la pleiv de Lumbrein empustau a S. Pieder siu zenn grond, che peisa tschunconta quater tschenès. Tochen Cuera ei il transport daventaus entras la viafier e da leu naven sur Flem tochen Glion sin in carr de punt cun otg cavals. Ei fuva mars. La neiv era svanida ed ei entscheveva ad esser schetg per la cultira entuorn. Quei ei il temps nua che la tiara sesarva per retscheiver las semenzas. Era il pigiament dellas vias semuenta. Ellas ein buca schi stagnas sco il temps d’atun. Nuotatonmeins ei il transport vargaus tochen Glion senza incaps. Mo strusch ch’il zenn ha giu passau la punt dil marcau, che las rodas dil carrun sfundran d’ina vart tochen tier igl ischel. Surpri sco cura che Goliath ei curdaus per tiara, vesan ils de Lumbrein, ual arrivai ord Lumnezia, co lur zenn s’emparuna da quella vart per tiara vi. Suenter nauscha murtirada risan ins puspei en peis il cantadur grond. Il fravi de Glion arriva denton cun siu marti per far l’emprova, schebein la vusch dil zenn hagi pitiu. Per ventira tunava ei nuota da fess. L’autra damaun vegn ei schunschiu vid il carr de punt buca meins che diesch cavals. Mond suenter dus a dus portan ils umens aissas de plantschiu per tschentar giun plaun, nua che la via pareva memia lucca. Cun petras breigias arrivan ils cavals tochen la baselgia de s. Martin sur Glion. Leu sfundran las rodas da tala maniera, che tut dar agra, stuschar, stilar, sevilar e secussegliar muenta buca roda pli. Il vitturin sedeclara per surventschius; el sappi far ne pass ne miez pli e stoppi dischunscher ils cavals. Denton arrivan ils de Lumbrein cun ina sliusuna fabricada ord termenta palaunca grossa. Ei suonda ina muaglia mugias ch’ins havess detg ch’ei fuss scargada dell’alp, sch’ei fuss buca stau temps de primavera. Cun bein s’enschignar ei il zenn prest staus postaus sin quella sliusa, vid la quala ils purs schunschan lu dudisch pèra mugias. Ins vesa cheu giuvs novs diraglia sco ies. Il fried dil lenn niev e della pial frestga dils terschins ed umblazs, unschi cun sunscha rontscha, sefa sentir da recent. Mintga patrun stat sper sias mugias schunschidas, streha sul dies ora, carsina las pitgarinas compleinas, sgratta denter la corna las totonas de sias caras e sesenta loschs de tonta honur concedida a ses biestgs. Cun la detta crutscha urentan ei la ferradira, ch’ella seigi buca memia largia e buca memia cuorta. Ins sto schunscher uliv, sch’ins vul ch’ei mondi bein. Tut ei bein preparau per la partenza; mo mintga pur vesa en igl égl de siu vischin a tarlischar il dubi, schebein las mugias possien quei ch’ils cavals havevan stuiu plantar leu a mesa via. Igl aug mistral che regla il menaschi dat aunc in’egliada liunga si per la baselgia de s. Martin sper via sco de rugar per agid e cloma lu cun vusch anguschada “hi”. Ils empaladers aulzan las tortas liungas e lonzias e smeinan giu per las costas, ch’ei schula sco de dar garniala. Ils umens giheschan ord culiez stendiu hi, hi, hi, stauschan, catschan, stilan, che las fatschas secotschneschan tras las barbas neras tschuoras. Ils peis dellas mugias peglian pétg, la membra stagna sestenda, las costas sesarvan, la gnarva sestila, il - 26 -culiez sesliunga ch’ils égls sescufflentan; ossa e giuvs ein per storscher ne rumper. Ord la pitgarina dils bos tgula ina buffada desperada e si da funs dil pèz anguschau dils umens vegn ina schemida ferma... il cuolm de bronz semuenta, va anen, va viers Porclas. Ordavon ina gronda roscha umens cun badels e busgidas ulivond las vias buttanusas, pleinas ruosnas e pultauns. L’arrivada dil zenn grond en Val Lumnezia ei stau sco ina fiasta per mintga vischnaunca ch’ins passava. Perquei ch’il zenn fuva staus benedius giu S. Pieder, han ils zenns de mintga tuor salidau il pli grond cantadur della Val Lumnezia. A Cumbel ei il pader capucin comparius en stola ed ha dau la benedicziun alla vitgira schi cara, greva e prigulusa. Ils zenns tuccavan sco cura ch’igl uestg fa viseta pastorala el cumin. Cun l’alva dil di fuv’ins semess sin viadi ed ins ei arrivaus a Lumbrein enten far brin. Tut tgi che haveva combas saunas fuva dado vischnaunca spetgond il zenn. Ils umens han lu survegniu ina buna marenda avon che scargar, e las mugias havevan in pursepen tgemblau, schegie ch’ei fuva primavera e ualti clar els clavaus. Ils purs e lur menadiras havevan gie dumignau quei che diesch cavals

havevan buca pudiu ventscher.

Gl’auter di setractava ei de trer il zenn, il smisereivel coloss, sin clutger. Ins temeva ch’igl endrez della suga savessi haver breigia de tener la peisa. Per far la segira han ins postau ina pluna ogna el santeri sper la tuor, per ch’il zenn, en cass ch’el havess de curdar, rumpessi buc. Cura che tut ei stau pinau, ha ina gronda massa pievel tratg vid la suga, che tunscheva lunsch dals funs viadora. En buca grond’uriala ei il zenn, per grond smarvegl de tuts, staus si avon la finiastra della tuor. Cun in endrez special eis el lu vegnius internaus. La glieud che vegneva da tuttas varts ord autras vischnauncas, per mirar co ei fussi pusseivel de collocar in zenn aschi pesont sin l’aulta tuor, ei arrivada memia tard per ver con che mauns e manuttas pon en lavur cumina.


Ord: Caminada, Rest Giusep (1926). Il zenn grond de Lumbrein. Cudisch de leger per las scolas primaras romontschas. 5avel onn. Cuera: Casanova.

 

                                                                                        

Comments