Mitologia Péz Regina

da Clau Solèr


Foto: Ramun Capaul



… ed in a mai viu pli scazis sin quai péz. 

Quei raquenta Mariuschla Capaul-Capaul, ni sco quei ch’ella vegneva era numnada a Lumbrein: Mariuschla tschurra, Mariuschla Martin u schizun Mariuschla-Gion-quel-Geli cun indicar empau da ses perdavons. 
Ei setracta dil Péz Regina; mo ei quei propi ver? Datti negins scazis si leu? Ed hai forsa insumma dau pli baul scazis? 
La tradiziun populara sa da scazis, mo ein els stai da contonscher? Lein intercurir empau pli en detagl la situaziun.

1938 publichescha il scolast e pur Anton Derungs (*1883, †1942) sper autras era la sequenta getga – aschia numn’ins en Lumnezia las detgas – el 52avel tom dallas Annalas da la Società Retorumantscha:

Il cavrer de Pezza Regina

Il cavrer de Silgin fuva revius in di d’uost tochen sin Pezza Regina. Sias cauras camavan ruasseivlamein leuvi sil fil, ed il cavrer semetta a far in cupid el cauld sulegl viagiusut ils umens de crap. El runca e dierma sc’in crap. Il sulegl fuva daus vi in bien ruc viers il Pez Sezner, ch’il bien pasturet vegn puspei allerta.
Mo tgei smarvegl! Avon sesez vesa el ina bellezia femna, che filava fils d’aur giu d’ina rucca. Il pei de quella fuva de cristagl, la sutga della filiera haveva in pusal tut sularau ded aur, ed ils calzers della femna fuvan surcusi d’aur ed havevan fivialas d’argien. Entuorn roda, rucca e sutga fuva ei rasau muneidas e cadeinas, anials e bratschelets tut ded aur sin bellezia cozzas de seida e vali.
Tut surstaus fetga il mattatsch in mument siu egl sin la rischlada de custeivlas bittas. Mo lura sto el serrar in mument ils egls e fruscha quels cun omisdus mauns per veser pli bein, tgei ei seigi propi avon el. Mo duront ch’el arva la bucca per dar ina susdada, aud’el in schem ed ina scarsada, in sfrac ed ina zaccudida, sco sch’il pez mass en scaglias. Arvend spert ils egls, fuva tut stuliu. Pudeis cumprender, tgei snavur ei ida al cavrer da tgau tocca pei! El cuora entuorn, tschercond la visiun: mo negliu in fastitg.
La sera ha il mattatsch raquintau il schabetg a sia mumma. Lezza carteva nuota bien e va gl’auter di ora Cumbel tiel pader. Ella raquenta tut quei che fuva schabegiau manedlamein a quel, e lez di: «La filiera ei in’olma en peinas. Vies mattatsch havess saviu spindrar ella, sch’el ughegiava de dumandar, tgei ei maunchi. Silmeins havess el duiu better siu paun silla muneida, sche stueva quella star cheu.»
Turnada la sera acasa, ha la mumma dau si la cunzina al cavrer. Bunamein mintga di ha il pauper mattatsch stuiu ir quei onn sin Pezza Regina a far l’ura. Ei sentelli, ch’el veva era mintga di in detg toc paun enta pugn avon sedurmentar. Mo la visiun ei mai turnada pli, e las muneidas e bittas ein probabei zuppadas giufuns il Pez Regina. Sche quel sballuna buc’ in di, vegnan ellas probabel era buca alla glisch pli. (Derungs: 149/150).

Mo nov onns pli tard, 1947, dedichescha il scribent Guglielm Gadola la 21avla annada dil “Calender dil pievel. Annalas per historia, litteratura e cultura romontscha”, Il Glogn, alla Val Lumnezia. En quei calender, senz’auter pli derasaus che las Annalas, sa la populaziun leger in tschuppel getgas ed empau versets ord la regiun. Il redactur paleisa la fontauna d’ina seria getgas e scriva sin p. 4: «In grond survetsch ha sgr. cand. med. vet. E. Gartmann de Surin prestau a nus, percurrend bunamein l’entira Lumnezia, per rimnar ord bucca dil pievel in’entira partida dellas bialas [getgas e praulas, C.S.] de nossa collecziun. Ad el, sco era a quels che vulan buca esser menziunai, nies pli cordial e sincer engraziament.» Ina da quellas getgas “rimnadas ord bucca dil pievel” raquenta dil Péz Regina:

La regina de Piz Regina 

Avon biars onns habitava si Pez Regina ina regina. Quella fuva fetg beinstonta. Ins vesev’ella mo dis de bial’aura. Sia habitaziun fuva ina tauna. Bials dis de stad sesev’ella avon la tauna sin in crap. Vestgida fuv’ella en aur. Avon ella steva ina roda de filar, era ded aur, decorada cun ornaments d’argien. Igl entir di filav’ella mo aur. Tgei ella figieva cun quellas caussas sa negin. Denter la crappa vi havev’ella rasau zacons lenzeuls, persesez era tut dad aur. Gia biars havevan empruau de tagliar giu ed ir silmeins cun ina buccada d’in lenziel ne l’auter, mo quei ei aunc mai reussiu ad in carstgaun. La regina udeva e veseva fetg bein. Aschigleiti sco zatgi vegnev’en sia vischinonza svanev’ella en tauna e cun ella tut igl uorden che ella haveva dentuorn. Ded ir giu en la tauna ha buca carstgaun ughiau zacu. Inagada eis ei reussiu ad in nurser de Lumbrein, ch’era sin Sernastga, de vegnir vitier in lenziel, senza ch’ella ni vesi ni audi. Mo aschigleiti ch’el ha tuccau en il lenziel ei la regina svanida e cun ella era il lenziel.
In’autra gada er’in giuven nurser sin quell’alp. Gia biaga havev’el admirau quella regina. Ei era ina fetg biala matta, ed el ei s’inamuraus en ella. «Quella ni negina,» ei immediat stada sia resoluziun. Liung temps ha el fatg pertratgs co sefar vitier la biala e dar d’entellirad ella ses sentiments. – –

Ei fuva puspei in bi di de stad. El pertgirava sia muntanera si Pez Ner. La regina seseva puspei giu Pez Regina avon tauna e filava. El haveva gia biaga empruau d’aquistar la matta, mo quei er’aunc mai reussiu ad el. «Oz fetsch’jeu puspei in’emprova, » di el siper sesez. Sezuppond davos la crappa e mo bufatg s’approximescha il nurser alla regina. Gia eis el sisum Pez Regina. Ei auda co la roda de filar va. Siu cor batta ferm. «Speronza gartegia ei quella gada!» tratga el. El til’ora ils calzers, per buca far canera. Mo plaun e bufatg seruschn’el d’in crap a l’auter. El ei gia aschi maneivel ch’el auda il flad della biala. «Mo aunc in pèr pass ed jeu hai ella». Bufatg, gie il pli fin lader havess buca saviu far quei meglier, seruschn’el tochen tier l’auter crap. «Ussa aunc in segl, ed ella ei en mes mauns! Siu cor batteva aschi ferm ch’el carteva la regina udess. Mo lezza filava ruasseivel vinavon. Mo la disgrazia ei cheu. Vulend sepreparar per il segl, vegn nies bien nurser cun in cumbel encunter in ur d’in lenziel, ch’era rasaus sper el. El auda mo in sgarscheivel griu e la tiara trembla sut siu tgierp, ch’el crei de curdar ella profunditad dil Pez Regina. Sco il cametg era la regina svanida cun tut las caussas en tauna. Tut sturnius ei allura il nurser ius aunc quella sera a casia e mai pli turnaus sin Seranastga, e si Pez Regina era buc. Mo la regina han ins dapi quei di era mai viu pli. La tauna en la quala la regina habitava ei oz ton sco dada ensemen. Ins vesa mo aunc zacons scalems che menavan giuden ella habitaziun della regina. (Gartmann: 68/69).

Aschilunsch la getga ch’Emil Gartmann ha udiu enzanua duront siu “viadi da rimnader”. Remarcablamein scriva Gadola buca plaid dalla parentella cun la versiun che Derungs haveva scret ellas Annalas avon nov onns, gie el gnanc menziuna la collecziun da Derungs, schegie che biaras getgas serepetan dètg fideivlamein. Che la getga era ualti derasada en Lumnezia, confirma in ulteriur text che Gartmann ha anflau enzanua:

In’autra detga della Regina de Pez Regina

In di ei il cavrer de Surin ius si Pez Regina cun las cauras. Tochen ussa havev’el aunc mai engartau zatgei extraordinari si leu. Mo co eis el surstaus, vesend lenzeuls d’aur rasai ora pertut. Aunc bia pli perplex eis el staus, cura ch’el ha viu amiez il pez ina biala giuvna vestgid’en aur. Avon ella steva ina roda de filar. La matta filava aur. Il cavrer ha temiu e vuliu fugir. «Buca tema miu pign, jeu fetsch nuot a da ti!» ha la matta detg. Udend quella vusch carina ha il buob survegniu curascha ed ius pli vitier. «Jeu sun la Regina de quei pez,» ha la giuvna continuau. «Ti eis igl emprem che vesas mei. Mo ti astgas dir a negin tgi che ti has viu si cheu oz. Dus onns stoss ti quescher, lu ei la glieud de quels vitgs cheugiu beinstonta avunda, che tuts san viver sco signurs.» Il cavrer ha empermess quel e puspei ius suenter sias cauras. Liung temps ha el pudiu quescher, mo buca dus onns ontras. Sch’el mava in di si Pez Regina vesev’el adina la matta. Mo dapi il di ch’el ha schau mitschar ora il misteri ei la Regina svanida per adina. (Gartmann: 72).

Ei fa surstar empau ch’in student pli avanzau (cand. med. vet.) sa nuot ni vul saver nuot da quei ch’ei vegniu publicau avon gnanc diesch onns sur da siu camp da retscherca. Ei constat denton che las Annalas eran strusch derasadas en Lumnezia; il register dils abonnents dallas Annalas, p. 230 cuntegn per 1938 numnadamein per l’entira Lumnezia sulettamein tschun nums. Aschia eran las getgas rimandas e publicadas da Derungs scodagir nunenconuschentas ella vallada e quellas el Glogn propi “novas”.

Viers la fin dil medem Glogn lai Gadola aunc suandar 17 “Detgas e praulas lumnezianas” ch’el declara d’haver rimnau sez. Numera 14, p. 134 raquenta aunc inaga dil vau sutterran:

Il trutg sutteran dil Pez Regina

En Lumenzia vegn raquintau che avon vetas de glieud il Pez Regina spidavi fiug e che la rusna ch’ins vesi silla tschema seigi in «crater.» In curaschus cavrer seigi ius giuaden ina gada, ed ei vevi perfin sco scalems; mo vegnend pli e pli stgir, haigi el stuiu turnar anavos … Ina gada haigi quei cavrer vuliu vegnir sissu, sch’ei seigi propi ver ch’il Pez Regina haigi ina senda sutterrana. Ins scheva che la sortida sesanfli a Degen sper in foss schigiaus ora. Il cavrer fa giu cun ses cumpogns, ch’ei dueigien star sper la rusna de quei foss e spitgar. El prendi in gat cun el e betti giuden el el crater dil Pez Regina. Detg e fatg! E prendei mira! Circa in’ura e mesa pli tard vegn il gat dil cavrer neudora dalla turera vita a Degen. (Gadola: 134).

Aunc duront la secund’uiara mundiala pelegrinescha il perscrutader da getgas e cardientschas blauas, Arnold Büchli, per la Surselva entuorn ed entscheiva a rimnar getgas. Fetg tard, pér 1966 publichescha el lu il secund cudisch dall’ovra fundamentala “Mythologische Landeskunde von Graubünden” che cuntegn il material da “Die Täler am Vorderrhein, Imboden”.
Denton varga 20 onns pli baul, numnadamein gia 1944 ha Clara Casanova (*1872, †1950) da Vella raquintau al perscrutader ina getga dètg remarcabla:

Auf dem Piz Regina entführt     Vella

Einmal im Frühling, so erzählte meine Mutter, spielten die Kinder im Freien, im Baumgarten Réisch in Villa. (Igl mattitscheign figeva turmaigls egl curtgin Réisch.) Und als sie nach Hause gehen wollten, fehlte eines der Mädchen im gleichen Alter wie meine Mutter, vielleicht von zehn Jahren. Sie haben sie zwei Tage gesucht und nirgends gefunden. Erst am dritten Tag hat man das Kind in der Nähe der Ortschaft, in einer Gadenstatt auf den Steinplatten vor dem Stall, gefunden (an ins afflau igl affon en in’acla avon nueigl), und es sagte, eine Signura, schön gekleidet, habe es auf den Piz Regina getragen, und es habe dort oben gesessen. Diese Tochter ist später nach Italien gegangen und dort gestorben. (Büchli: 473).

Il Glogn cun quella getga ei cumparius pér 1947, aschia ch’igl ei da considerar quella getga da Vella sco autentica, buca influenzada direct d’ina versiun scretta.
Era la getga che Gion Giusep Pelican (*1864, †1944) raquenta 1943 a Lumbrein a Büchli ha el pli probabel strusch saviu leger enzanua – per cass ch’el havess insumma legiu; cheu sia versiun dalla ruosna sil péz:

Die Höhle auf dem Piz Regina     Lumbrein

Ai vegn risdau ca sigl Péz Regina seigi∂t ina gronda rûsna. Ina ga an in fiers ign tgaun en quella rûsna. Luscha ais el gnijus ò gijusût Pruastg. (Büchli: 547).

Quei fatg misterius sto esser staus ragischaus dètg profund ella schientscha dil pievel. Entuorn 1960 havein nus udiu el, cura che nus pertgiravan la biestga a Curtinasch sur Nussaus e miravan tut fascinai sin il péz visavi. Igl ei da supponer ch’il raquintader haveva la getga or dil Glogn da 1947, cunquei che Büchli cumpara pér 1966 e quei aunc per tudestg!
Empau auter ston ins giudicar quei che Maria Urschla Capaul-Capaul (*1879, †1964) da Lumbrein raquenta. Arnold Büchli vegn pér 1959 l’emprema ga en contact cun ella. Nossa getga para ella d’haver raquintau aunc pli tard, numnadamein 1962. Aschia ei la getga strusch pli da considerar sco autentica, mobein in fretg dalla lectura dil Glogn da 1947. Ei sto denton buca esser ch’ella ha legiu la getga 1947, mobein quei sa esser schabegiau bia pli tard. Calenders e cudischs periodics en general eran ina lectura beinvesida ed ins legeva els tochen ch’els eran propi isai e curdavan in ord gl’auter. El meglier cass ha Mariuschla mo raquintau quei ch’ella ha giu udiu. Quei ei mo ina hipotesa, mo ualti probabla, perquei ch’ella raquenta a Büchli bia historias e getgas ch’ins enconuscha ord la litteratura classica ed ord calenders.

La regina sigl Péz Regina     Lumbrein

(Remarca: Büchli sestenta da scriver sco quei ch’ins tschontscha a Lumbrein; il segn „∂“ tuna sco in „e“ nunaccentuau).
Pi baul raquintav∂n ai bia d∂ quai péz. Ign nursè d∂ Silgin mava savens sin quai péz, ∂d ina gà ch’el ai staus si a’l viu ina dama ch∂ veva ina cruna d∂d aur sigl tgau ∂ s∂seva sper ina roda d∂ filâ ∂ filava aur. Ell’a liu discuora cun el. Aber el era ign malign ∂d a liu tschappâ ella ∂ pigliâ ella culla roda ∂ cugls teppis e tût ∂nsem∂n, a lu ais ella svanida.

Ign cavrè da Silgin a viu bia gà quella dama d∂ lunsch, aber el t∂meva ella. A lu ign gi a ella clamau el d∂ gnî tier ella. ∂d el ai ius plaunsiu vitier, a lu a ella getg ch’el astgit gî a nigign carstgaun ch’el agit viu ella si cau ∂ tschintschau cun ella. Pér suénter dus onns astgit el gî ô quai; a lu sègit ella lib∂rada ∂d el vegnit ad esser rehs avûnda, igl pi reh ûm d∂ quai contûrn.
Quai era in’olma, ina regina ch∂ stueva stâ lausi ∂ filâ aur. Aur dat ai daried sin quai péz. P∂rquai ai in mess a quai péz igl nûm «Péz Regina». Aber igl cavrè a bû pudiu quescher quai, p∂rquai ch’el era mo ign bu∂b, ∂d el a getg ò. ∂ suénter a el mai viu ella pli, ∂d in a mai viu pli scazis sin quai péz.
In raquenta ch’i sègit stau pi baul ina gronda rûsna sigl Péz Regina ∂d ina scala ch∂ mava giuadén. Miu fegl Martin (*1913, †1961) ai staus cavrè d∂ Silgin ∂d ai ius sigl Péz Regina. Lu ais el ius ∂nzacons pass giudén en quella rûsna. Aber lau er’ign sgarschaivel lûft ∂d ign terribel burlém, ch’el t∂meva, ∂d el ai ius anavos. antûrn ∂ntûrn la rûsna era mescal, aber la scala a el bû viu. Quai ai stau avon onns, ∂ suént∂r ai nigign pli ius viasi tochen quella rûsna. (Büchli: 568).

Remarcabel eisi che Mariuschla colligia la getga e la veta reala cun raquintar in schabetg concret da siu fegl Martin e co ella commentescha igl alpinissem pauc sviluppau da quei temps; ei deva scodagir negin turissem ella val. Plinavon valeva il Péz Regina era buca gest sco in’attracziun en cumparegliaziun cul Péz Ault e specialmein il Péz Terri.
Igl ei bein probabel che la getga ei svanida ord la memoria dil pievel duront duas generaziuns dapi 1966, sch’el ha insumma legiu ella cur ch’il cudisch da Büchli ei cumparius. En scadin cass ein fastgitgs restai, perquei ch’il cudisch era dètg derasaus era tier glieud meins scolada. 1982 ei la getga puspei vegnida alla glisch, ni forsa meglier getg ad ureglia. Il radio romontsch e Norbert Capeder han creau in’emissiun da Radioscola sur da Lumbrein e leu han els puspei raquintau e stampau la getga. Ins ha duvrau la versiun dad Emil Gartmann sco quei che Gadola ha giu publicau 1947 el Glogn.
Sco quei ch’igl ei deplorablamein usitau en reediziuns, han ins buca surpriu il text sco quei ch’el era, mobein manegiau ch’ins stoppi modernisar ed actualisar el. Per ventira setract’ei cheu mo dad in’adattaziun ortografica migeivla che ha buca lavagau il text sez.
El carnet da Radioscola san ils affons schizun mirar co il Péz Regina vesa ora. In maletg en detagl cun la crappuna maunca denton.

La regina dil Péz Regina

Avon biars onns habitava sil Péz Regina ina regina. Quella fuva fetg beinstonta. Ins vesev’ella mo dis da bial’aura. Sia habitaziun fuva ina tauna. Bials dis da stad seseva ella avon tauna sin in crap. Vestgida fuv’ella en aur. Avon ella steva ina roda da filar, ch’era dad aur. Igl entir di filav’ella mo aur. Tgei ch’ella fageva cun quellas caussas sa negin. Denter la crappa havev’ella rasau zacons lenzeuls, persesez era tut dad aur. Gia biars havevan empruau da tagliar giu ed ir silmeins cun ina buccada d’in lenziel ni l’auter, mo quei ei aunc mai reussiu ad in carstgaun. La regina udeva e veseva fetg bein. Aschigleiti che zatgi vegneva en sia vischinonza svanev’ella en tauna e cun ella tut igl uorden ch’ella haveva dentuorn. Dad ir giu en la tauna ha buca carstgaun ughegiau zacu.
Inaga er’in giuven da Lumbrein nurser sin l’alp da Sernastga. Gia biaga havev’el admirau quella regina. Ei era ina fetg biala matta, ed el ei s’inamuraus en ella. «Quella ni negina», ei immediat stada sia resoluziun. Liung temps fa el patratgs co sefar vitier la biala e dar d’entellir ad ella ses sentiments.
Ei fuva puspei in bi di da stad. El pertgirava sia muntanera sil Péz Ner. La regina seseva psupei giu Péz Regina avon sia tauna e filava. El haveva gia biaga empruau d’acquistar la matta, mo quei era aunc mai reussiu ad ella. «Oz fetsch’jeu puspei in’emprova», di il nurser si per sesez. Sezuppond davos la crappa e mo bufatg s’approximescha el alla reginia. Gia eis el sisum Péz Regina. El auda co la roda da filar va. Siu cor batta. «Speronza gartegia ei quella gada!» tratga el. El til’ora ils calzers, per buca far canera. Mo plaun e bufatg serusch’el d’in crap a l’auter. El ei gia aschi maneivel ch’el auda il flad dalla biala. «Mo aunc in per pass ed jeu hai ella». Bufatg, gie il pli fin lader havess buca saviu far quei meglier, seruschn’el tochen tier l’auter crap. «Uss aunc in segl, ed ella ei en mes mauns!» Siu cor batteva aschi ferm ch’el carteva che la regina udess. Mo lezza filava ruasseivlamein vinavon. Mo la disgrazia ei cheu. Vulend sepreparar per il segl, vegn nies bien nurser cun in cumbel encunter in ur d’in lenziel, ch’era rasaus ora. El auda uss mo in sgarscheivel griu e la tiara trembla sut siu tgierp, ch’el crei da curdar ella profunditad dil Péz Regina. Sco in cametg era la regina svnaida cun tut las caussas en tauna. Tut sturnius ei allura il nurser ius aunc quella sera a casia e mai pli turnaus sin Sernastga, e si Péz Regina era buc. Mo la regina han ins dapi quei di era mai viu pli. La tauna, en la quala la regina habitava, ei oz ton sco dada ensemen. Ins vesa oz mo aunc zacons scalems che menavan inaga giuaden ella habitaziun dalla regina. (Ord: Il Glogn 1947); adattau 1982 (Radioscola: 9).

Quei fuss ussa stau ladavosa versiun, derasada tras il radio ed en in carnet destinaus per scolasts e scolastas. Vus essas puspei in pass pli lunsch ed haveis legiu la getga egl internet, in mied modern e globalisau dad ina vart, da l’autra vart denton serrau per la glieud che sa u vul buca duvrar il computer. Per ventira san ins aunc stampar e leger las getgas a la moda veglia – e lu raquintar ellas a la moda la pli originala.


Commentari

Igl ei buca pusseivel d’eruir, cura che las empremas detgas dil Péz Regina ein naschidas. Detgas vegnan raquintadas d’ina generaziun a l’autra e pér bia pli tard ein ellas vegnidas nudadas. Enzacu han collecziunaders nudau ellas, savens cugl intent da mantener ellas per las generaziuns che vegnan. Mo mintgaton sentevan els era il regl artistic e poetic e perquei ein las detgas vegnidas modificadas, amplificadas e buca da rar era cumbinadas cun differents elements jasters, aschia ch’ellas han piars il coc. Bugen ein ellas vegnidas publicadas en calenders ed en cudischs da scola. Ina part dil pievel ha legiu ellas e beinspert puspei raquintau vinavon ellas. E puspei ha enzatgi vuliu mantener il scazi dil pievel e rimnau ellas e scret si e publicau ellas sco material oral, genuin autentic, schegie che las fontaunas screttas ein gnanc ina generaziun veglias; en nies cass setract’ei d’in pèr onns.
Noss’emprema fontauna ein las detgas ch’il scolst e pur Anton Derungs da Surcasti ha rimnau (cu?) e publicau 1938 ellas Annalas da la Societad Retorumantscha. Quella publicaziun era buca ton populara e derasada specialmein en tscherchels scolastics, religius ed intellectuals. Il pievel cumin veseva buca quei cudisch periodic. Certs ch’han legiu las detgas, p. ex. scolasts han lu raquintau vinavon ellas ed aschia derasau lur cuntegn – la furoma semida da raquintader a raquintader.
Oz astgass in redactur strusch selubir da publicar bunamein las medemas detgas gia 1947 cun indicar E. Gartmann bunamein sco collecziunader prezius, mo senza menziunar ch’il cuntegn era vegnius derasaus nov onns pli baul.
Empau auter eis ei cun la rimnada da Büchli. Cunquei ch’el indichescha minuziunsamein cura ch’el ha registrau ina getga. Aschia ha mo Mariuschla Martin raquintau suenter 1947 sia getga, quella ch’ins sto pia considerar pli probabel sco resultat u product dalla lectura dil Glogn.
Questa getga u ina semeglionta ei buca d’anflar ella Crestomazia da Casper Decurtins. Quei fa denton buca surstar pli ch’in ton, cunquei che quell’ovra cuntegn en general meins detgas che praulas e canzuns.
Setract’ei pia d’ina getga unica, originala, inventada enzacu avon 1930 ella Lumnezia? Strusch, ei dat numnadamein semegliontas getgas ell’Engiadina. Gia egl emprem tom dallas Annalas da 1886 ha Thomas Gross publicau ina cumparegliabla, nua che carstgauns nauschs emprovan d’engular las teilas preziusas dallas dialas e che quellas svaneschan per adina. Gudench Barblan rimna in triep getgas da quei tip e publichescha ellas 1909, medemamein ellas Annalas 24. Las biaras da quellas dialas ein survetscheivlas e segidan culs cartgauns, tochen che quels daventan impertinents u malengrazieivels u risguardan buca las cunzinas dallas dialas. Autras vivan isoladas e la glieud mo vesa ellas.
Ei setracta pia buca d’ina getga originala dalla Lumnezia, mobein sulettamein d’in tip da getgas adattadas alla regiun, cheu al Péz Regina. Fetg derasada ella tradiziun populara era ella segir buc, cunquei ch’ella figurescha buca els cudischs da scola pli vegls che cuntenevan schiglioc savens material local. Mo forsa dependeva gliez era empau dil redactur e da sias enconuschientschas localas e preferientschas. Sco quei ch’jeu survesel la situaziun, mauncan semplamein texts da quellas getgas en Surselva avon 1938.

 

Foto: Ramun Capaul


Fontaunas dallas getgas: 

-Barblan, G. (1909).…en: Annalas da la Societad Retorumantscha, 24, p. 225-316; specialmein p. 246-249:   Las filunzas da Vulpera; la diala della Clemgia; Las dialas da Pratuor; Las dialas da Vulpera dadaint; las dialas süll’alp del Munt a Cierfs.
- Büchli, A. (1989, 1966). Mythologische Landeskunde von Graubünden, Band 2. Disentis: Desertina.
- Capeder, N. (1982). Scolas da Lumbrein presentan lur vitg. En:
Radioscola, nr. 3; cun cassetta sonora.
- Derungs, A. (1938). Entuorn las ruinas de Surcasti. Enzacontas detgas e praulas, risdadas da tats ed ondas. En: Annalas da la Societad Retorumantscha, 52.
- Gadola, G. (1947). Detgas e praulas lumnezianas. Rimnadas da G. G., Cuera. En: Il Glogn, calender romontsch. Glion: Moriz Maggi artavels.
- Gartmann, E. (1947). Detgas e praulas lumnezianas, rimnadas da E. G., cand. med. vet. Surin. En: Il Glogn, calender romontsch. Glion: Moriz Maggi artavels.
- Gross, Th. (1886). Las Dialas e l’Alp da Munt. Dialect da Cierv, Val Müstair. En: Annalas da la Societad Retorumantscha, 1, p. 338-342, specialmein p. 340.


Clau Solèr, prof. dr. Cuera/Genevra, 6-2011.


Comments